Meerwunder

Hans Sachs: Historia: Königin Deudalinda mit dem meerwunder [PDF]

		Der Lamparder cronica sagt das,[Bl. 59b]
		Wie ein köng in Lamparten saß,
		Agilulphus genennt mit nam,
		Der viertzehendt könig freysam.
5		Hett deß königs tochter, genannt
		Deudalinda, auß Bayerland,
		Ein zartes weib, ehrlich und frumb.
		Die eins tags in dem königthumb
	A	Außfuhr an das meer spatzieren
10		Und wolt ein klein sich ermayiren
		Mit iren edelen junckfrawen,
		An deß meeres gstatt in einr awen,
		Da zu erfrischen ir gemüt
		In deß grunenden meyen blüt.
15		Mancherley farb blümlein sie funden.
		Da sie artliche kräntzlein bunden
		Und hetten da singende reyen
		Mit ander freuden mancherleyen,
		Eine hie und die ander dort.
20		Aber die köngin an dem ort
		Fuß für fuß gieng da in kürtzweyl
		Etwas fast auff ein viertheilmeyl
	A	In dem gestreuß ans meers gestatt.
		Da sie alsbald ersehen hatt
25		In dem meer ein schröcklich meerwunder,
		Einer grewlichen gstalt besunder,
		Das uberal verwachssen war,
		Wie ein ber, mit rabschwartzem haar.
		Sein augen glasteten mit fewer.
30		Auch hett das meerwunder unghewer
		Zwen flügel wie die fledermeuß.[Bl. 59c]
		Diß meerwunder auß dem gestreuß
		Eylt geschwind her auß dem meer tiff
		Und die zart königin ergriff.
35		Die köngin thet ihm widerstreben,
		Schrey: "Mordio!" von leib und leben.
		Doch unerhöret war ihr stimm.
		Das meerwunder in sterck mit grimm
		Sie ubergweltigt, mit ir rang,
40		Fellt sie und in dem gstreuß notzwang.
		Die köngin schrey in hertzenleyd.
		Indem ein ritter vom gejeyd
		Ungfehr reit, hört die kläglich stimm
		Der frawen und rennet in grimm
45		Dem gestreuß zu, dem geschrey nachsucht.
		Da gab das meerwunder die flucht
		Und sprang hinein das wüttend meer.
		Die köngin betrübt weynet sehr.
		Doch zeygt sie dem ritter nicht an,
50		Was das meerwunder hett gethan.
		Sagt, es hett sie wöllen ertrencken,
		Mit gewalt in das meer versencken.
		Der beleyt die köngin forchtsam,
		Biß zu dem frawenzimmer kam.
55		Die war vol hertzleyd, angst und schrecken,
		Vol unmuts in dem hertzen stecken.
		Doch sagt sie niemand die geschicht.
		Nach eim monat fund sie gericht,
		Daß die köngin war schwanger worn
60		Von dem meerwundr, und hat geborn
		Nach der zeit ein ungschaffen sun,
		Rauch und schwartz, gleich seim vatter nun.
		Deß iederman groß wunder hatt
		Und hielt es für ein wunderthat.
65		Dises kind aufferzogen wur,
		Das war gantz dückischer natur.
		In seiner jugend junger jar
		Es vil kinder bescheding war.
		Mit sein fingern ir augn außstach,
70		Sie stürtzt, ihn arm und beyn abbrach.
		Als er kam in das zwölffte jar,[Bl. 59d]
		Er gar wüst und tyrannisch war
		Und bracht umb vil der edlen knaben,
		Wo die mit im geschertzet haben.
75		Das hofgsind hett an im ein grawen,
		Er schwecht auch frawen und junckfrauwen.
		Zuletzt ward er gar ungestümb,
		Daß er bracht etlich männer umb,
		Wer ihm solch böse stück ward wehrn,
80		Ihn ziehen wolt zu fürstling ehrn.
		Als in der köng einsmals selbst strafft
		Mit worten, wurd er so boßhafft,
		Daß er den köng mit trutz loff an,
		Mit zogner wehr, und ihn wolt han
85		Erstochen auff deß königs saal.
		Der allein war und hett dißmal
		Sein rechten son, welcher bald zug
		Von ledr und auff das monstrum schlug
		Und dem könig da halff zu stund.
90		Doch wurdens all beyd von im wund.
		Doch hawtens im auch wunden groß.
		Die köngin kam und selber schoß
		Mit dem handbogen manchen stral,
		Biß sie doch erlegten zumal
95		Dises ungefüge monstrum.
		Nachdem der alte könig frum
		Die köngin war anreden thun:
		"Diser ist nicht gwest mein sun.",
		Weyl er nicht gwest wer seinr natur.
100		"Darumb bekenn lauter und pur,
		Von wem du den entpfangen hast!
		Deß ehbruchs solt kein uberlast
		Haben, sey dir warhafft vergeben,
		Nicht mehr zu dencken dein gantz leben."
105		Da sagt die köngin her besunder,
		Was sich mit dem schendling meerwunder
		Vor diser zeit begeben het,
		Und den ritter anzeygen thet,
		Der auch irem gschrey zu war kommen,
110		Als das meerwundr die flucht het gnommen.
		Der ritter da bekennen thet,[Bl. 60a]
		Der hinderwertling gsehen het
		Das meerwunder ins meere springen.
		Der köng gelaubet disen dingen.
115		Aller sach wol zufrieden war.
		Doch hett er lust auch mit gefahr,
		Dises meerwunder selbst zu sehen,
		Von dem diser grewl war geschehen.
		Und reit mit seinem son außhin.
120		Namb auch mit ihm die königin
		Gleich zu dem gstreuß, da ir vor jarn
		Die grewligkeit war widerfahrn
		Von disem schröcklichen meerwunder.
		Die zwen verhielten sich besunder
125		Im gstreuß. die köngin gieng einwertz,
		Doch war ir darzu schwer das hertz.
		Indems meerwunder auß dem meer
		Sprang und eylt auff die köngin sehr.
		Die fieng mit krefften an zu schreyen
130		Umb hilff, gar kleglich disen zweyen.
		Vatter und son von leder zugen,
		Auffs meerwunder stachen und schlugen.
		Das sich ernstlich zu wehr ward stellen
		Mit beissen, werffen und mit krellen,
135		Wann es war sehr krefftig und starck
		Und sehr schwind, gantz mördisch und arg.
		Wehrt sich ihr auff ein gantze stund,
		Biß sie es doch hawten todwund,
		Daß es fiel und lag todt zuletzt.
140		Der köng sich seiner gstalt entsetzt.
		Zogen wider heym von dem meer
		Und sageten gott lob und ehr.
		Die gschicht geschehen ist fürwar
		Ungfehr, als man sechshundert jar
145		Nach Christi geburt zehlet hat.

		Beschluß

		Auß der geschicht man klar verstaht,
150		Daß ein weyb nich sol weit spatzieren
		Und auß fürwitz sol umbrefieren
		An orten, so sind öd und wildt.[Bl. 60b]
		Daran ein ehrlich weibesbildt
		Etwann geschendet werden mag
155		Ohn iren willn bey nacht und tag
		Von einem unverschempten mann,
		Da sie sich nicht entschütten kann
		Mit irm notschreyen oder gelffen.
		Ir auch auß gfahr kan niemand helffen.
160		Auch nicht kan helffn ir gegenwehr,
		Sonder kombt umb ir weiblich ehr,
		Die sie nicht widerbringen mag.
		Hat darob schand ir lebent tag.
		Ob es gleich sonst kein mensch mehr weiß,
165		Muß sie doch sorgen böß geschreys.
		Derhalb sol sich ein weib einziehen,
		Alle einsame örter fliehen
		Und sich halten bey der gemeyn.
		Da sie verwart mag sicher seyn
170		In zucht irer weiblichen ehr
		Bey ander ehrling frawen mehr
		Und werd gefreyt solch ungemachs.
	A	Den trewen rhat geyt ihr Hans Sachs.

Meerwunder – Editionstexte

Hans Sachs: Historia: Königin Deudalinda mit dem meerwunder [PDF]